What is hidden behind poster? film posters

Facebooktwittergoogle_plusredditpinterestlinkedinmailby feather

पोस्टरमागे दडलंय काय?

प्रेक्षकांना सिनेमाकडे खेचून आणण्यासाठी लोकप्रिय कलाकारांची छबी पोस्टरवर मस्ट असते. पण हल्ली मात्र वेगळाच ट्रेंड समोर येतोय. सध्या भर आहे तो टीजर पोस्टर्स बनवण्यावर. प्रमुख कलाकारांना झळकवण्याऐवजी सिनेमाची थीमच कल्पकपणे पोस्टरवर मांडली जाते…

पूर्वीचे कोणतेही सिनेमे घ्या, सिनेमांच्या पोस्टर्सवर हट्टाने कलाकारांचे चेहरे टाकले जायचे. त्यांना त्यांचा लूक फॅन्ससमोर पेश करण्याची घाई असे. पण अलीकडे मराठीत मात्र थोडा वेगळा ट्रेंड पाहायला मिळतोय. हल्ली सिनेमाबाबत कमालीची गुप्तता पाळली जातेच. शिवाय, सिनेमाबद्दल उत्सुकता वाढवणारे टीजर्स पोस्टर्स बनवण्यावर भर दिला जातोय. यंदाच्या वर्षात झळकणाऱ्या मराठी सिनेमांची पोस्टर्स अशीच गूढ असतील. सिनेमात झळकणाऱ्या मुख्य कलाकारांच्या चेहऱ्यांऐवजी सिनेमाची थीमच पोस्टरहिरो होताना दिसेल.

कोटाआड लपलंय कोण?

टीनएजर्सची लव्हस्टोरी दाखवणाऱ्या ‘टाइमपास’चा सिक्वेल ‘टीपी टू’ या नावाने येणार आहे. प्राजक्ता आणि दगडू आता मोठे झालेत आणि त्यानंतर त्यांचा रोमान्स या सिनेमात दिसणार आहे. या सिनेमाचं पहिलं पोस्टर झळकलंय. नव्या प्राजक्ता आणि दगडूच्या भूमिकेत कोण दिसणार याची उत्सुकता टिकावी म्हणून हे पोस्टर लक्ष वेधून घेतंय.

पुणेरी पगडी आणि बेंच

‘लोकमान्य एक युगपुरूष’ आणि ‘क्लासमेटस’ हे सिनेमे नुकतेच आले. लोकमान्यांची ओळख असलेली पुणेरी पगडी, मिशी इतकाच चेहरा दाखवण्यात आला. यात केवळ आभासी लूक दाखवले गेले. ‘क्लासमेट्स’मध्येही एका बाकावर, खांद्यावर हात टाकून बसलेले पाठमोरे आठ क्लासमेट्स दाखवले गेले.

कोण ही सुंदरा?

मल्याळी ‘शटर’ या सिनेमाचा मराठी रिमेक याच नावाने लवकरच पडद्यावर येतोय. रेड लाइट भागातली एक मुलगी यात दिसेल. तिचा बॅकलेस ब्लाऊज आणि लोवेस्ट साडी हा लूक या पोस्टरवर झळकला आहे. खूप काही बोलणारं हे पोस्टर सिनेमाची उत्सुकता वाढवतं.

चिंब पाऊस आणि छत्री

‘बायोस्कोप’ या चार दिग्दर्शकांच्या चार सिनेमांपैकी एक हा सिनेमा आहे. विजू माने दिग्दर्शित या सिनेमाची कथा रंजक आहे. समोर उसळता समुद्र, वरून पाऊस कोसळतोय आ​णि छत्री घेऊन समुद्राकडे नजर लावून बसलेला पाठमोरा नायक असं या सिनेमाचं पोस्टर आहे. सिनेमाचं शूट सुरू असताना हा लूक क्लिक करण्यात आला. पुढे जाऊन कुशल बद्रिकेचं ते उभं राहणं हे सिनेमाचं पोस्टरपिक्चर बनलं.

कुणीतरी आहे तिथे

दिवाकर घोडके या नवोदित दिग्दर्शकाने ‘चित्रफित’ हा सिनेमा बनवला आहे. सिनेमाच्या पोस्टरवरून हा सगळा ‘हॉट’ मामला असल्याचं दिसतं. पण यातही चेहरे कुणाचेही दिसत नसून, फक्त सिनेमाचा बाज दाखवण्याचा प्रयत्न झालाय. ‘एमएमएस’ काढून फसवणूक करणाऱ्या तरुणाविरोधात उभ्या राहणाऱ्या तरुणीची गोष्ट यात दिसेल असं बोललं जातंय.

सर्व लक्ष रुद्राक्षावर

अतुल काळे दिग्दर्शित ‘बाळकडू’ सिनेमाचा पहिला लूक होता तो शिवसेनाप्रमुख बाळासाहेब ठाकरे यांचा हात, चष्म्याची कडा आणि रूद्राक्षांची माळ असा. ठाकरे यांची ओळख असलेल्या रूद्राक्षावर फोकस करणारं पोस्टर भाव खाऊन गेलं. सिनेमाचं नाव लिहितानाही ‘बा’या अक्षराला रूद्राक्षमाळेतूनच आकार देण्यात आला.

उत्सुकता वाढवण्यासाठीच

या पद्धतीला टीजर म्हणतात. सिनेमातल्या व्यक्तिरेखांचा लूक वेगळा असेल.. तो लवकर उघड करायचा नसला, की अशा टीजर्समधून प्रेक्षकांची सिनेमाबद्दलची उत्सुकता चाळवली जाते. अलिकडे मराठीत हा ट्रेंड खूप आहे. हॉलिवूडचा हा ट्रेंड पुढे हिंदीत आला. ‌विषय तसा असेल तर टीजर पोस्टर बनू शकतं. प्रत्येकाच्या मोबाइलवर असलेलं इंटरनेट लक्षात घेऊन ही पोस्टर्स बनवली जातात. यामुळे तरुणाईमध्ये सिनेमाची उत्सुकता वाढते.

– सचिन सुरेश गुरव, पब्लिसिटी डिझायनर

Poster and meaning

Poster and meaning